Ouchine ed Corwynn

Y’avo des pleufes su l’ville d’Anmiens ; nou Somme, ale alleut cor déjouqher dess pounasse, pi il alleut faire ed pus in pus fro : on alleut ête in octofe. Ch’diabe-lo, i n’saveut pu arqher, pu moyen d’coeuper un bout d’bo pou li faire ess fu du diabe (un fu espécial, fait esprès pou épanter chès jonnes files, pi ratourner l’cawète des nazus…)

Ch’pove diabe, i s’débateut din s’boutique (comme din l’canchon d’Hugues Aufray : « ch’bon Diu i s’énerveut din sn’atelier »… ), à n’pu sawoir doù qu’i metteut ses « lucifèr » (en néerlandais dans le texte !), ni ses soufflets d’maricheu pou li attiser sin fu…
L’pus pire din tout ça, jm’attends qu’c’éteut pou s’diabe-lo, dèn pu awoir personne à agonir, à emberdler, à abonminer, à fére berdoulher, à àrouter, à inporvinhier, à infumaqher, à indjilbeuder… ; bref, à emberlificoter dins ses greues. Et pi cor plus pire eq eq pire eq tout ça : Des minisses qui dévniont d’pus en pus mawais, din l’capitale des capitales, pou s’mète bénèse avec ch’tiot Nicopoléyon Bonaryin – Magyàrozy, chès minisses – lo, is avions décidé d’faire déjouqher tous ses poves gins rouleus, merligueudiers, pi dzeutes baraqueux : du coeup, pu d’tiote cambuse ed bo, pu d’cariole, pu d’tente ed campinge, pu d’creutte, meume pu l’pu tiot cayeu d’sérette pou s’aponner pa-dsous…
No diabe, qui jouqheut au mitant des abes, i n’aveut pu qu’à frumer s’boutique à fu, pi à s’mète dsus les cmins, comme un qhien sans maîte…

Mais un diabe, a n’peut po rester longmin sans fu – sans bwo, amon ! Y’areut-ti yu, fuche qu’un viu poèle Godin pour li s’récoeuffer, il areut ’té pu bénèse dins ces courts-jours. Mais, meume chez Deville (the devil was not friendly !), y’aveut po d’plache pou li s’mète au cheud… Pi on aleut bétôt ête à la Noël…

A force ed routailler à mzure, drouci – droulà, à plucsiner chez l’un chez l’eute, à tourniqher pi à bag.noeder, il a fini pa déteuper un racoin ed Qhiérache pou li s’mète au cheu. C’éteut einne vieille boutique ed caron rimplie d’fouftries à foute à l’huche ; einne tiote mason po grinde, mais tout d’meume einne mason « BCBG » (bonne cave, bon guernier)…
Ch’diabe, il s’a aniché ilà, pi i s’a mis à sn’ouvrage ed diabe : dins sin coeudron, il a rfait du fu avec du bwo d’Qhiérache, il a touillé dins sn’athanor magique, il a trifouillé ses lucifèrs, berdlés des paternotes ed diabe dins s’boutique, pi ça s’a mis à faire des buzins du diabe (forcémint !), qu’ont ’té s’faire intinde dins ch’Vimeu, dins l’Oèse, in Belgique, pi tout partout pi àvalà… Chès gins is ont’té épantés, Is n’aviont janmais pu intinde einne affaire parèle ! D’habitude, on n’aveut qu’einne musique à l’mote, du buzin d’apréteu, des notes qui fésiont Tic – Tac, toudis à l’mesure du temps d’inhui… Lo, y ‘aveut quique cheuse ed pas parèle, comme einne parlure ed goblin. S’musique – lo, a n’torneut pas rond comme einne horloge : l’diabe cornu li-meume, i s’éteut mis ddans !!!

Y’o eu des gins qui l’ont pris mal, ct’affaire là ! Is s’sont mis à berdler, à démépriser s’trahal du diabe pi à dire des mawaisetées. L’pape du grand buzin li-meume, i s’a mis en fouternasie… S’il aveut pu excommunier s’diabe, il l’areut fait, wois-tu ! L’pove diabe, i nn’a ’té quasiment calabe, catéreu, ça z’apothumieut dins s’tièce !

Pourtant, alintour ed no courtis, dans les pâtures pi les camps, dins quiques racoins po trop cor pollués par les Espirito – Monsanto ; dins les cawètes ed nazus pi les âmes ed no ratayons ; qui fuchent berqhés, féseut d’paniers ou bé d’sabouts ; carons, maricheus, tissieux ou bé cor violoneux, y o yu comme un miraque (po un mitant d’raque ! Nan, un miraque estraordinaire !), adon einne affaire po ordinaire : c’est l’véritabe musique ed no Picardie qui s’a étampie, qu’ale sinteut bon comme un tartron qui sort du four ; c’éteut comme l’apparition d’einne bièle pouillette au mitant d’einne éttchipe ed fotbale… Comme si no diabe il aveut fait épaterner l’temps dins sn’horloge : l’vraie véritabe musique ed nos poéyis picards, ale éteut erssucitée !

I n’y o po eu guère ed publicité su ct’affaire – làle ; ni à « Tertous is z’en parlont », ni à « Nous n’sons po jouqhés » ; cor moins à « Combé qu’ça coûte ? »… Mais vous ez quand meume pu l’vir à l’télé dins les tiots épisodes « Alintour » avec ch’Lafleur, li-meume ; vous l’ez don intindu faire du vrai buzin « made in par-ichi ». Si Ch’Lafleur – grind erportère il a yu un pipasso, c’est grâce à ch’diabe cornu-lo, vnu d’on n’sait pas d’où (i paraîtreut qu’i sreut mitant Bérton / mitant Bourguignon…)
(Canchon) : « Un Bourguignon fut son parrain, une Bretonne sa marraine… »

Vlo à coeuse q’èj voudreu inhui, vous faire montrer à tertous ilà, qu’un Lafleur ed chuque il doit ête donné à ch’diabe-lo, qu’il a su erfére intinde l’pu bieu des instruments d’musique picarde : eul pipasso

Frincho PERY, Harcigny, vindrédi 29 d’avri 2011